Cider Makers Dinner kl 19.00

Ein kveld der middag og cider passar til kvarandre.

Lurer du på korleis det er å dyrke frukt langs Sognefjorden, lage ulike sortar cider og få smakelege matrettar til å passe til desse? Då er du kommen til rett plass! Det er akkurat slikt me på Ciderhuset brenn for å fortelje om.

Så me startar med eit glas i handa med Balholm drikke eller med bær og frukt frå sesongen i ein frisk cocktail.

Drikke er sjølvsagt noko av essensen i ein Cider Makers Dinner – eller «Middag frå cidermakaren», på godt norsk. Me set saman ein pakke med tre ulike cider i tillegg til velkomstdrikken. Denne fortel me om før de set dykk til bords og utover kvelden. Ciderpakke kostar kr 500 per person, alkoholfri pakke kr 450. DEtte bestiller de ved ankomst.

Og me likar å dele mat rundt bordet. Så dei kalde forrettane kjem først. Meze heiter det då, slik det gjer rundt Middelhavet eller i Midt-Austen. Det kan vere heilnorsk og lokalt, til dømes røykelaks frå Keipen lokalmat, eller ost frå Anne-Karin i Aurland eller kjøt frå Olav Arnar i Vik – rett over fjorden. Eller det kan vere smårettar inspirert av landet vertinne og kjøkensjef Tuba kjem frå; Tyrkia. Då kan retten kanskje heite sigarbörek eller mucver eller noko anna som verkar litt framandt, men som plutseleg er fylt med Jarlsbergost eller nyplukka bladpersille frå hagen bak kjøkenet.

Til hovudrett set vi fram til å dele kjøt- eller fiskeretten for denne veka, eller ein vegetarisk/vegansk rett. Desserten eller det søte til slutt kjem alltid med bær eller frukt frå den økologiske hagen vår eller frå naboen.

Vi håpar å sjå dykk i Ciderhuset.